首页 > 报纸波经 > 东方日报>  正文
2018-01-13 本文来源:互联网
Wing Wing+Renee陪你睇德甲
经过4星期歇冬,东网德甲直播 X 「我爱酒地波」又返嚟,2018年头炮仲搞新意思,我的搵到东网生活嘅音响产品模特儿Wing Wing加盟,挑机女神Renee,两个靓女加埋走地专家Jason同乐比,喺新一年陪你睇德甲,究竟Wing Wing会带嚟乜野火花?大家今晚记得睇东网啦!至于我的直播嘅赛事,系云达不来梅主场对贺芬咸,两军实力接近肯定打甩髀。
(on.cc东网周六晚10时起直播 「我爱酒地波」,赛事10时30分开波)
不来梅贺芬咸细演激斗
今晚直播戏码云达不来梅主场对贺芬咸,不来梅虽然排喺尾三,但新帅哥菲特上任后无论表现同成绩都明显跃进,遇上作客唔算肋嘅贺芬咸牌面均势力敌。不过两军今仗阵容同样不整,不来梅中前场两大领袖因伤缺阵,贺芬咸又卖走左主力射手辛度华拿,双方近5次碰头有4次总入球少于2.5球,今季两度交锋各赢1次1比0,今晚预期又系入波唔多嘅激战,推介有2.1倍嘅中位数2.5球细盘。
不来梅仍处于降班区,不过哥菲特为球队带嚟希望,上任后4场联赛共抢7分,德国盃亦淘汰弗赖堡闯入8强,今晚主场出击原本甚有抢分信心,可惜中前场重心巴迪尔斯养伤,中场输血管汤马士迪兰尼亦加入伤兵行列,少左呢两大领袖,不来梅组织能力大为削弱,只能踢比较简单直接嘅足球,要威胁主守嘅贺芬咸防线难度大增。
客军卖走箭头辛度华拿
贺芬咸歇冬期继续有出冇入精打细算,除左将德国国脚射手辛度华拿卖左畀拜仁慕尼黑外,连助教舒列奥达都放走埋畀荷甲阿积士,不过少帅拿高斯文向来擅长内部挖潜,短期内球队锋力当然削弱左,但长远问题唔大,记得球队上季表现出色嘅两名德国国脚历卡斯苏尼同施巴斯坦鲁迪季前双双畀拜仁撬走,球队冇乜补充,季初对拜仁一样可以赢波。不过贺芬咸今仗中场同样阵容不整,大将迪米亚巴尔同拿迪安阿美利齐缺阵,相信箭头乌夫同基拿比得到嘅供应亦会减少,今场双方势均力敌又同样遇上组织能力不足问题,拉锯战下相信入波唔慌多。